Arane Perangan Awak

Ngoko                   Krama madya                 Krama inggil
Alis                       alis                                   imba
Ati                        manah                            penggalih
Awak                     badan                             salira
Balung                  balung                            tosan
Bangkèkan            bangkèkan                     pamekan
Bathuk                  bathuk                           palarapan
Bokong                 bokong                           bocong
Brengos                brengos gumbala           rawis
Cangkem              cangkem                        tutuk
Cengel                  cengel                            griwa
Dhadha                 dhadha                           jaja
Dhengkul              dhengkul                        jengku
Dlamakan             dlamakan                       samparan
Driji                      driji                                racikan
Embun-embunan embun-embunan            pasundhulan
Endhas                  sirah                               mustaka
Epèk-èpèk             èpèk-èpèk                      tapak asta
Geger                    geger                               pengkeran
Gelung                  gelung                            ukel
Getih                     rah                                    rah
Githok                  githok                            julukan
Gulu                     gulu                                jangga
Gusi                      gusi                                wingkisan
Idep                      idep                                ibing
Idu                        idu                                 kecoh
Iga                        iga                                  unusan
Ilat                        ilat                                 lidhah
Irung                     irung                              grana
Janggut                 janggut kèthèkan           adhegan
Jènggot                 jènggot                           gumbala
Kémtol                 kéntol                            wengkelan
Kringet                 kringet                           riwé
Kuku                     kuku                              kenaka
Kuping                  kuping                            talingan
Lambé                  lambé                             lathi
Luh                       luh                                 waspa
Mata                     mripat paningal              soca, nétra
Pipi                       pipi                                pangarasan
Praupan                praupan                         pasuryan
Pundhak               pundhak                         pamidhangan
Pupu                     pupu                              wentis
Rai                        rai                                  pasuryan
Rambut                 rambut réma,                 rikma
Riyak                     riyak                              jlagra
Sikil                      suku                               ampéyan
Susu                     susu                               prembayun
Swara                   swanten                         swanten
Tangan                 tangan                            asta
Umbel                   umbel                             gadhing
Untu                     untu                               waja
Uyuh                     toyan                              turas
Unyeng-unyeng     unyeng-unyeng               panengeran
Weteng                 weteng                           padharan
Wudel                   wudel                             tuntunan

Falsafah Jenthik Lima Tumrap Wanita

1.Jempol utawa ibu jari. Dadi wanita kudu duwe sipat kaya jempol, yaiku tansah hormat, sopan, lan tansah muji kakunge minangka kepala kulawarga. Kabeh wong yen ngaturi lenggah utawa dhahar marang wong liya mesthi ngacungake jempol. Semono uga ibu marang kakunge uga kudu mangkono sikepe.

2.Telunjuk utawa jenthik kang nomer loro. Dadi ibu aja mung nyadhong dhawuh saka kakunge, nanging kudu bisa nunjuk utawa nuduhake endi kang bener lan endi kang luput marang para putrane. Jalaran kepriye bae sing jenenge bocah yen ora dituduhake mesthi bakal ora ngerti, yen ora ngerti lan ora ana kang nuduhake tumindake mesthi ngawur kang tundhone kleru.

3.Panunggul utawa jenthik tengah. Iki nuduhake menawa kedhudhukane isteri minangka pimpinan urusan rumah tangga iku sejajar utawa padha karo tugase bapak minangka kepala kulawarga. Bapak mandhegani urusan jaba, dene ibu mandhegani urusan jero. Wong bebrayatan, urusan jaba karo urusan jero kudu imbang. Mula dadi ibu rumah tangga kudu bisa ngatur sakabehe.

4.Jenthik manis. sing jenenge wong bebrayan iku dumadi saka telung unsur yaiku bapak, ibu lan putra, tetelune ngatunggal mau kudu kerep kumpul dadi siji. Yen gothang utawa kurang siji bae rasane kurang pas. Luwih-luwih sing ora ana iku ibu, rasane dadi hambar. Ana ing wektu kumpul iku mau ibu kudu bisa nuduhake watak manis, ana ing kalodhangan wektu ibu kudu bisa menehi crita-crita kang sarwa manis marang kulawargane sarta menehi hiburan werna-werna.

5.Kelingking utawa asring disebut jenthik. Kelingking iku jenthik kang paling cilik, iku nggambarake menawa ibu kudu duwe watak cilik kang maksude kudu andhap asor. Kajaba iku kudu wicaksana ing samubarang kalir sarta aja gampang kabranang, luwih-luwih yen nampa kabar kudu ditimbang-timbang. Umpamane entuk kabar saka liyan menawa garwane nyleweng karo wanita liya, iku aja banjur percaya nanging kudu andhap asor, ditelithi kanthi permati.  

Tampi Pasrah Panganten Kakung

          Nuwun,

          Winantu ing kawilujengan.

          Sinartan sinukartaning panambrama,

          Ibu miwah Bapak R. Rusna Wijaya dalah putri putra, dalasan Sanggyaning kulawarga punapa dene para rawuh.

          Nuwun, tumanggap pangandikanipun Bapak Imam, ingkang anyulihi Ibu tuwin Bapak R. Rusna Wijaya, amasrahaken panganten kakung, kaparenga kula matur, minangka sesulihipun Ibu saha Bapak R.M Suyanto Wiratmaja, kula kadhawuhan tampi pasrah panganten kakung.

          Pramila, kaparenga amratelaken bilih ing samangke wanci 10.00 panganten kakung kula tampi kanthi sae, dadosaken bingahing manah, saha sumangga muji muja syukur konjuk ing Hyang Murbeng Gesang.

          Salajengipun panganten kakung badhe sarimbit kaliyan panganten putri, Asih Sulastri dumungkap upacara candhakipun. Kula nyadhong pangaksami bok bilih wonten kakirangan saha kaladuking panampi.

          Nuwun.

Pasrah Panganten Kakung

        Kasugengan saha sih nugrahaning Gusti ingkang Maha Asih mugi kajiwa kasarira wonten ing Panjenengan sedaya.

          Kairing sagunging pakurmatan,

          Ibu saha Bapak R.M Suyanto Wiratmaja, tuwin para putra-pitri, dalasan sagung kulawarga, miwah para rawuh.

          Nuwun, keparenga kula matur, minangka sesulihipun Ibu saha Bapak R. Rusna Wijaya sakulawarga, kula kadhawuhan masrahaken panganten kakung, Adi Sumantri katur Ibu saha Bapak R.M Suyanto Wiratmaja.

          Wondene kalampahanipun makaten: kala wau wanci 09.45, panganten kakung kula pendhet saking dalem Jl. Gombel Permai angka 22, kanthi kairing para sepuh, kulawarga, sanak kadang, mitra tepangan, sawatawis, kula bekta sowan dumugi ing dalem Jl. M.T Haryono angka 77 ngriki, kalayan gangsar saha gancar.

          Pramila, ngembun sarta ngemban dhawuh wigatosing sedya, keparenga ing samangke panganten kakung kula pasrahaken tuwin kula sumanggakaken katur Bapak Jono Sudarjo ingkang anyulihi Ibu dalah Bapak R.M Suyanto Wiratmaja, cundhuk kaliyan lampahing upacara.

          Wasana kula nyuwun pangaksami bok bilih anggen kula nindakaken ayahan punika wonten ingkang kirang dadosaken pirenaning panggalih.

         

          Nuwun.